1جی بؤلوم
ائلیاد: واختینیزی منه وئردییینیزه گؤره یئنه تشککور ائلیرم.
اولده بیر کوللی سورویلا ایستیرم باشلاییم
هادی قاراچای: دیمز
ائلیاد: و اودا بو کی سیز بو گون کی آذربایجان ادبیاتینا نئجه باخیرسیز؟
هادی قاراچای: چوخلو اومود
ائلیاد: آذربایجان دئمکدن طبیعی کی گونئیی نظرده آلیرام
هادی قاراچای: چوخلو آیدینلیق
گؤزل گلیشیملر گؤرورم
گنجلیییمیزه باخاندا گوونجیم آرتیر
دوغرودور شعرلریمین بیرینده ده یازمیشام
شعرینی قافییهسینه ساتانلاریمیز دا وار
آنجاق گئنل بیر باخیشدا مودئرن یازین مودئرن ادبیات ایستر شعرده ایسترسه دوز یازی(نثرده) اولدوقجا گؤزل آددیملار آتیر
کئچدییی یول اولدوقجا اوغورلودور
سیز بو گونوموزون گنجلییینین شعرینی اؤرنک اوچون بیزیم دؤنمدکی چاپ اولموش شعرلرله توتوشدورون
مهد آزادی قزئتینده سایین یحیا شئیدانین گنجلیکدن وئردیگی اؤرنکلره باخین
ایسلامی بیرلیکده
یول درگیسینده باسیلمیش شعرلرله توتوشدورون
اوندا منیم دئدیییمله قولایجاسینا سسبیر اولاجاقسینیز
دوز یازیدا دا ایشلر بئلهدیر
ائلیاد: ساغولون
من سیزین یازیلارینیزی الیمدن گلن یئرهجان ایزله ییرم
و ائله اونا گؤره بیرینجی سوالین جوابینی حدس وورا بیلیردیم
آنجاق ایندی بو سورو یارانیر کی
سیزجه ایندی جریاندا اولان ادبیات ائله همن گوونمهلی ادبیاتین اؤزودور ؟ یوخسا بو گونکی یازینیمیز یاخشی وا اوغورلو ساباح لارا سبب اولا بیله جیینه گؤره اوغورلو اولور؟
هادی قاراچای: کسینلیکله بو بیزیم ایستدیییمیزدیر دئمئک یانلیش اولار
آنجاق دئدییینیز کیمی بو گونوموز ساباحیمیزین گوزگوسودور
ساباحا اولان اومودوموز اوزوندن بو گونکو دوروموموزو اوغورلو و گووئنجلی گؤروروک
بیرده بایاق دئدیگیم کیمی اوزاق دئییل ائله ایکی اوچ اون ایللیک اؤنجه نین یازینی ایله توتوشدورولدوغوندا بونا اومود باغلاماق یانلیش اولماز
ائلیاد: ساغولون
بو گونکی ادبیاتیمیزین اساس فاکتورلاری و اوزللیکلری ندیر؟
نمنه بو ادابیاتی باشقا اولکهلرین و دؤورهلرین ادبیاتیندان آییریر؟
یعنی ایستردیم بیلیم کی سیزجه
ادبیاتیمیز بیتؤو اولاراق اؤزونه آیید اولان فاکتلار تعریف ائلییه بیلیب؟
هادی قاراچای: سیزین بو سورونوزو قیسا کسمک ایستهسم یوخ دئیرم
آنجاق بو آرالیقدا نسه یوخدور دئمک دئییل
منجه
یئنه دئییرم "مئنجه "بیر چوخلارینین بونا اینانمادیغینی بیلدیگیم اوچون
مئنجه دئییرم
بیزیم گونوموزون یازینیندا
دیل فاکتورو
کیملیک فاکتورو
و اولدوقجا کریتیک اینتیقادی باخیش فاکتورو
ایزلرینی تثبیت ائتمیش فاکتورلاردیر
ایسته نیلن شاعرین یازیچینین یازیلاریندا بو فاکتورلارین ان آزی بیرینی ، کیمینده ایسه ایکیسینی، کیمسهده ایسه اوچونو ده گؤرمک اولار
بو باخیمدان مودئرن یازینیمیز اؤزللیکلرینی ایچریک اولاراق اورتایا قویور
فورم اولاراق دا کلاسیک فورمالارین غزل قصیدهسیندن توت
قوشما گرایلی سیناجان بوردا واردیر
بوراسینی دا دئییم
گونوموزون یازینینی دوننیمیزدن آییران فاکتورلار چوخدور
آنجاق اؤلکهلرین ادبیاتیندان آییران فاکتورلاری آراشدیرماق اوچون کونکرئت اولاراق هانسی اؤلکنی یا اؤلکهلری
دوشونورسونوز بونو آیدینلاشدیرمالیسینیز
ائلیاد: گومانیما سورومون جاوابینی آلا بیلدیم آنجاق بیر اؤرنکله منظورومو بیر آزدا آچیقلاییم
مثلن لاتین آمئریکانین یازینیندا موشخص دؤورلرده اؤزلرینه مخصوص اولان فاکتلاری گؤرونور
و بونو آیدینلیقلا مثلن هیندیستان ادبیاتییلا آییرماق مومکون اولور
دوز دوشونموشمسه
سیز بویوردونوز کی
بو اولای تامام اولاراق بیزیم ادبیاتیمیزدا هله یارانماییب
دئییل می؟
هادی قاراچای: دوزدور
ائلیاد: بئله ایسه بیزیم بو گونکی یازینیمیزین چاتیشمایان یئرلری سیزجه هارالاردیر ؟ ندیر ؟ هارادا آخساییریق؟
هادی قاراچای: دوزونه دورساق
اکسیک اولانیمیز یوخدور
بیزده نؤوحه ادئبیاتیندان توت
(دینچی ادبیاتدان دانیشیرام)
ائروتیک ادبیاتاجان(قیرمیزی شورتونون چوچالا بارماغینا ایلیشمهسیندن یازان سئوگیلی زیبا کرباسی، کفلمه چکمه سینی آنلادان سایین
رامین جاهانگیرزاده و 32 آتان-چکن دومان اردم بی بیلری) ده واردیر
دلیجهسینه شعارچیلیغا گیرن هادی قاراچای دا وار و ان یوکسک ائستئتیکلی مودئرن شعرلر یازان
سید حیدر بیات دا وار
آیدین آراز دا وار
نیگار خیاو کیمی درین و دوشوندوروجو شاعریمیز ده وار
کیان خیاو
ایسماییل مددی
لوایی
و آدلارینی چوخ چوخ اوزون بیر سیرادا سیرالییا بیله جییم شاعیرلریمیز وار
ایندی
سیزین سورونوزا دؤنسک(یاخچی بس چاتیشمایان ندیر؟) دئیه سوروشساق
هه
ادبیات گئنیش بیر آنلامدیر
و اؤز وارلیغینی بیر نئچه اون ایللیک ایچینده تثبیت ائتمهسی
سادهجه اولمازین ایشیدیر
بیزده ایسه
سورکلی اولاراق هئچ بیر دؤنمده بو گونکو کیمی
آردیجیللیقلا ایرلی لمیش دؤنمیمیز اولماییب
قوشاقلار بیر بیرینین آردی اولماییب
سایین هوممت بی شهبازینین دئدییی کیمی اوختایلا بیزیم قوشاغین آراسیندا 40 ایللیک بیر آرا وار
دئنییملر تجروبه لر قوشاقدان قوشاغا بیر بیرینه کئچنمهییب
بئله اولدوغو بیر دورومدا بیزیم گونوموزون یازینینی لاتین آمئریکانین ایسپانیول یازینی ایله قاریشی قارشییا قویماق بیر آز گولونج اولار
آنجاق من گونوموزون دومان اردمینی ده رامین جاهانگیرزادهسینی ده
بوتون اؤلکهلرین خالقلارین ادبیاتیندا گؤرورم
نیگار خیاوینی
کیانینی
س.ح.بیاتینی ایسئ یالنیز اؤز دوروموموزلا اوزلاشان
بیزیم گونوموزده اولان خالقلارین یازینیندا ایزلمک اولار
بونلارین شعرلرینده سوسیال یاشامین قاتی ایزلری وار
اونا گؤره.
ائلیاد: ساغولون
ایندی بو سورویلا قارشی گلیریک کی بئله ایسه بو گئدیشده گونئیین ائشیگینده اولان گونئی شاعرلرینین نئچه فایز سهمی اولور ؟
هادی قاراچای: ائشیکده ایچریده یاشایانلاری آییرماق منجه یانلیش اولار
ائشیکده کیلرین ایچینده بیلیمسل شعر دئیه گلن سایین سولئیمان اوغلونو بیر یانا
غزل قوشما یازان، اؤزوده باشدان آیاغا فارس سؤزجوکلو فارس دیلینین سؤزبیرلشمهلری ایله بئزدیلمیش غزللر یازان شاعیرلئریمیزی ده بیر یانا قویون
ایستنیلن بیچیمی دئنمیش اولانلاریمیز دا وار
غزلدن باشقا هانسییسا بیر شعر تانیمایانلاریمیز دا وار
ایچه ریده دوروم نئجهدیرسه ائشیکده ده اونون مینیاتورونو چیزه بیلرسینیز
ائلیاد:ساغولون
ایندی بیر آیری سورو
هادی قاراچای: بویورون
ائلیاد: شعرده کیشیلیک یوخسا قادینلیق آیریمینا اینانیرسیز؟یانی سیزجه یازارین قادین یوخسا کیشی اولدوغو اونون یازینیندا بللی اولمالیدیر؟ایرسه بئلهدی قادین شعریمیز_یالنیز یازارین جینسیتینه باخمایاراق_نه حالدادیر؟
هادی قاراچای: آسلانین ارکک دیشیسی اولمور دئییب آتالار
ایندی هانسییسا قادینین شعرینی اوخویورکن اونون قادین اولدوغونو دا آنلاسان
دئمک قادین اولدوغونو بیله ن و بو وارلیغینی اوخوجوسونا چاتدیرماغی باشاران بیریسینین شعرینی اوخوموش اولورسان
آنجاق منجه ارکک یا قادین اولماغیمی گؤسترمهیه اؤز ندنلریم اولمالیدیر
بیر سیرا قادینلاردا بو اؤنملیدیر بیر سیراسیندا اؤنملی دئییل
منیم اؤزومه بونون هانسییسا بیر اؤنمی یوخدور
بیزیم قادین شاعیرلریمیزه گلینجه
من چوخ آز تانینان ائلناز ایسلاموندین شعرلرینی چوخ صمیمی گؤرورم
نیگار خیاوین شعرلرینی چوخ یئتگین چوخ پیشمیش و درین گؤرورم
ائلیاد: ساغولون
بیر سیرالارینا گؤره ادبیاتیمیزدا مافیا یوخسا مافیالار وار .سیز بو مافیالاری گؤره بیلیرسیز؟اصلن بئله بیر مافیالارین یوخسا لابیلرین اولدوغونا اینانیرسیز؟
البت اولا بیلسین کی بو لابیلرین هامیسی
پیلانلاشمیش و بیلهرکدن یارانماسینلار؟
هادی قاراچای: سیزه دئییم
من کسینلیکله بو مافیا آدلاندیردیغینیز، لابی دئدییینیزی بیرلیک دئیه چاغیراردیم
بونلار کسینلیکله واردیلار
اولوبلار و اولاجاقلار
آخی نیه من ائلیادلا اوتوروب دردلشه بیلیرم
آنجاق X بیله ائدنمیرم
نیه من کیانین شئیرینی سئویرم
X آغا یا خانیمین شعرینی سئومیرم
بونلار کیشیسل قونولاردیر
بونلارا مافیا دئمک یانلیش اولار
من آچیقجا دئییم
سئودیییم بوتون شاعرلرله ایلگی قورماغا چالیشیرام و باشاردیغیمجا بو ایشده ایسرارلی بیری یم
بیرلیکده اولماق سورون دئییل
بیرلیکده اؤزونه بیر بوت یاراتماق تاپیناجاق قورماق یانلیشدیر
کیمینسه اوتئریتهسینه اییلمک، کؤلگسینه سیغینماق یانلیشدیر
2جی بؤلوم
ائلیاد: هادی بی یئنه واختینیزی منه وئردییینیزه گؤره تشککورلریمی بیلدیریرم
اؤزللیکله بو کی
سیزی تایپ ائلمهیه مجبور ائدیرم
و بونا گؤرهده ایستردیم عوزر ایسته ییم
هادی قاراچای: عوزر ایستمهلی بیر شئی یوخدور
سن راحت اول
ائلیاد: ساغولون
سیزین باخیشینیز گونئیده اولان ادبی تنقیدلره گؤره نئجهدیر؟
هادی قاراچای: ادبی تنقیدیمیزده اؤزونون ایلک آددیملارینی آتیر
ائلیاد: اؤزوز بویوردوغونوز بیرلییین بو آرادا سهمی نه قدر اولور؟
هادی قاراچای: هله اوزون یولو وار
سایین دوستوم هوممت شهبازینین کیتابی ادبیاتیمیزی فارس دیلینده آراشدیرماسینا باخمایاراق
منجه قالارقی ایشدیر
سایین ائیواز طاهانین کیتابی اؤز دیلیمیزده اولماغینا باخمایاراق
گونوموزون دورومونا گیریشنمیر
مندن سوروشانیز جسارتی چاتمیر
آکادئمیک تحصیلاتینا صادق قالماق ایسته یی اونو بیر سورو گئنل دوشونجهلردن قیراغا چیخماغا یول وئرمیر
ایندیکی گونوموزه گلدیکده ایسه
ایستر "دوشرگه" وئبلاغیندا
ایستر "یارینلار" وئبلاغیندا
اوخوجونون زؤوقونو یوکسلده بیلن
متنین درینلیکلرینی آچیب، اوخوجونون گؤره بیلمدییینی گؤز اؤنونه گتیرهجک یازیلار هله یوخدور
سون گونلرده گؤردویوم "آنتی لومپن" وئبلاغینین آچلیشینی ایسه سایین ائیواز طاهایا تبریک دئمک اولار
هئچ اولماسا شعر و ایدئولوژی قونوسوندا عینی فیکیرلری بؤلوشورلر
جسارت قونوسوندا دا ائیواز بی دن یوخاری چیخا بیلمیرلر
یئنه ائیواز بیین اؤز آدییلا(ادبی ایجتیماییتده اولان آدی ایله) چیخیش ائتمهیه جسارتی اولوب
بونلاردا او دا اولماییب
آنجاق هر یئنی سس بیر اومود قیغیلجیمیدیر
منیم اؤزومو اینکار ائدهجک بیر سس اولسا بئله
بو سسین یوکسلمسینی و درینلشمهسینی ایسته مه مک ائله اونلارین دئدییی کیمی نارسیسیسم اولار
ائلیاد: ساغولون
هادی قاراچای: باغیشلایین
بیرلییین سؤز قونوسو اولدوغونو اونوتدوم
ائلیاد: بیرلیک آدلاندیردیغینیز قونونون سهمی ادبی تنقیدده نئچا فاییزدیر؟
هادی قاراچای: یئری گلمیشکن دئییم
بونلاری مافیا آدلاندیرماق یانلیشدیر
ایستر منیم دوشونجهلریمله اوزلشن بیر بؤلوک اولسونلار
ایسترسه منیمله قارشی اولان دوشونجه نی ساوونسونلار
سهمی یا اؤز سؤزوموزله "پایی" هله بللی دئییل
بیر زامان سورهسی کئچمهلیدیر
ایشلره باخیلمالیدیر
سونرا دیه ر وئریلمهلیدیر
ائلیاد: ساغولون
ایندی ایستردیم بو سورویا توخوناق کی
سیزجه بیز شاعر و یازیچی اولاراق (تنقیدچی یوخ)بیر بیریمیزین آدینی چکمکدن نیه قورخوروق؟
البت بو اولای سیزین نسلیزدن
منیم نسلیمه گلدیکجه چوخالیر
اصلن بونا اینانیرسیز؟
هادی قاراچای: یوخ دوزو بو اولدوقجا کیشیسل(شخصی) مسئلهدیر
قوشاقلارا دا باغلی اولاجاغینا اینانمیرام
آنجاق کیمینسه یوکسلمهسینی اؤزونون ییخیلماسی کیمی دیرلندیرن کیمسه
باشقالارینین آدینی چکمکدن چکینمهسی دوغالدیر
بیرده بو آرادا چؤرک بورج وئرمک کیمی ده آلیناجاغیندان قورخوب سوسانلار دا اولا بیلر
منجه بو هئچ ده یاخچی بیر کاراکتئر دئییل
ائلیاد: ساغولون
گونئیله قوزئیین شعرینی توتوشدورماق مومکوندور؟
بئله ایسه نظرینیزی ایضاح ائدین
هادی قاراچای: بیر دیلین ایکی ادبیاتی وار
یاشادیغیمیز سیاسال سوسیال قورولوشلارین دئییشیکلییی بونو اورتالیغا قویوب
بونو بیز سئچمه میشیک
منجه آذربایجان رئسپوبلیکاسیندا یازین اولدوقجا گوجلودور
ایستر شعر اولسون ایستر دوز یازی؟
اؤزللیکله اؤیکولر
رومانلار
اوردا چوخ درینلره ایشلمیش بیر دورومدادیر
بیزیم شاعریمیز شعر یازماقلا دیل اؤیرنیرسه
اورادا
دیلینی اؤیرنمیش شاعر شعر یازیر
بو چوخ بؤیوک بیر آرا بیر فاصیلهدیر
آنجاق اورادا او آتموسفئرین شاعری اؤز چئورهسینی تمثیل ائدیرسه بیزه آکتواللیغی گونجللییی اولمایان بیر شعر کیمی ده گله بیلر
بیزیم گؤروب اؤیرنیب آلیشدیغیمیز ائستئتیک دیرلری داشیمایا دا بیلر
آنجاق شعر بیر بوتون اولاراق دیرلندیریلمهلیدیر
اونون ایچرییی ایسه بو بوتونون آنجاق بیر بؤلومو بیر اوزودور
بئلهلیکله دوستوم
من آذربایجان رئسپوبلیکاسیندا اولان ادبی ایجتیمایتی بیزیمکیندن قات قات گئلیشمیش گؤرورم
ائلیاد: هادی بی بورادا بیزم بیر سیرا چتینلیکلریمیز واردیر
اؤزونوزده بویردوز
بیز دیلی مکتبده اؤیرنمیریک
و بو بیر چوخ باخیملاردان بیزی دالدا قویور
آنجاق ائله بو سؤزو هر کس بیر تهر دئییر
هره بیر تهر بو مؤوضونو آچیقلاییر
ایندی من بو سؤزو سوروشورام کی
سیزجه ایرسه بیزیم دیلیمیز مکتبلرده تدریس اولسایدی
ایندی هر نه روالیندایدی؟
یعنی ایستیرم عرض ائلییم کی
مکتبسیزلیکدن باشقا بیزم یازینیمیزی دالی قویان اولایلار دا وار؟
هادی قاراچای: کسینلیکله باشقا چاتیشمایان، یئتمهین یؤنلر ده وار
آنجاق باخ دوستوم
شعر دیلده باش وئریرسه بو دیلی بیلدییینجه یازاجاقسان
بیزیم شعریمیز هر ندن اؤنجه دیلدن اولان بیلگیمیزجه یازیلیر
بو باخیمدان اوخولسوزلوق، اؤز دیلینده ائییتیمسیزلیک باشلیجا رولو اویناییر
بو قونودا دئییلنلر منجه دوغرودور
ایچینده قابارتما، یئکلتمه یوخدور
باشقا سورونلارا، چاتیشمازلیقلار گلینجه
بیز ایراندا ائییتیم آلیریق
فارس دیلینده
فارس دیلینین یئری
دونیا ادبیاتیندا چوخ کیچیجیک بیر یئردیر
بو دیله چئوریلن باشقا ائللرین ادبیاتی هله اؤزلوگونده یئترلی دئییل
بیزه چاتان بونلاردیر
بو پنجرهدن دونیایا چیخماق قولای ایش دئییل دوستوم
ائلیاد: یعنی شاعرلریمیز دونیانین ان گوجلو شاعرلریده اولا بیلرلر اگر(اؤزوموزده دئییل) هنده وریمیزده اولان اکسیکلیکلر قالدیریلسالار؟ها بئله یازارلاریمیز؟
هادی قاراچای: کسینلیکله بئلهدیر
نیه ده اولماسینلار؟
اینسان دورومونون ایچینده اؤزونو گؤستریر
باشقا سؤزله اولدوغوموز دوروما اولان رئاکسیامیز بیزیم یاشامیمیزین آنلامیدیر
ایندی شعریمیزین سیاسال اولماسیندان قورخانلار وار
ائروتیک شعر تابولار ایچینده یئر آلیر
آرادا نه قالیر؟
بیر اؤزونو دؤنه دؤنه یانسیماق
یار قاشینا گؤزونه غزل صادر ائله مک
مداحلیق
بو دا بیزی هارا گؤتورهجک بیلیرسینیزمی؟
بو گون اولدوغوموز یئره
سایین ائیواز طاهانین "آلما یولو" کیتابینا یازدیغی اؤن سؤزده بئله بیر تومجه وار
قامچیلار اؤلکهسینده، شاعر نه یازماغی باجارار نه سوسماغی
یادیمدا بئله قالیب
سؤزجوکلر باشقا واریانتدا دا اولا بیلر
آنجاق سؤز بو ایدی
ایندی ائیواز بی اؤزو شعرین ایدئولوگیایلا سیاستله ایلگیلنمهسینی شعرین ایدئولوگیا سوییهسینه "یئنمهسی" کیمی دیرلندیریر
سؤزدن اوزاغا دوشدوم باغیشلا
آنجاق سؤزومو یئنه ده دئییرم
بیزیم گنجلیییمیز
گنج شاعرلریمیز، اؤیکوچولریمیز،رومانچیلاریمیز یئتیشمکدهدیر
گؤزل ترپنیش وار
و بونلاردا دونیانین دیرلی یازیلارینی سونماق گوجلری وار
اورتام یارادیلمالیدیر
ائلیاد: ایندی بیر آیری سورو
هادی قاراچای: بویورون
ائلیاد: اما اولده بونو دئییم کی
بوردا یایینلانمادان کیتابلار سیزه چاتیر
بو اصلن قبول دئییل ها
پاخیللیغیمیز گلیر
هادی قاراچای: پاخیللیغینیز گلمهسین
منه چاتمایانلارین ساییسی داها چوخدور
ائلیاد: اولسون
گلمز داها
هادی بی گنجلیگیمیزین ایچینده واردی ائلهلری کی حاضر اولاسیز اونلارین ادبیاتلارینین گله جه یینین اوستونده شرط باغلایاسیز؟
هادی قاراچای: من بیر یول
بو ایشی گؤردوم اودوزدوم
سایین حمید شهانقینین ایلک کیتابی چیخمیشدی
زنجیرده سئودا آدلانیردی
شعریمیزین ان سئویلیسی دوغولوب دئدیم او زامان
حمید بی بیزی سینیرلاریمیزدان ائشییه چیخارداجاق ایلک شاعریمیز اولجاق دئدیم
اولمادی
بیلیرسینیزمی نیه؟
حمید بی ده آکادئمیک اولدو
آنجاق
بو گون من گنجلیییمیزین ایچینده
سنه بیر چؤرک بورج وئریم
وئریم می؟
ائلیاد: بلی وئرین
ساغولون .سئوینجدن یئریمده دیسکیندیم
هادی قاراچای: لاله خانیم جوانشیره
آیدین آرازا
دومان اردمه
ائلیاد موسوییه
مایاک وئبلاغینین آصفیسینه
داها جانیم دئسین
ائلشنه
رسول ملیکزادهیه
عیسی زینی
عیسی زامان
پاشازاده
قهرامان اوغلو و بیر چوخلارینا
بؤیوک اومودلا باخیرام
هفته باشی پالتالکدا اولان
سؤزون سؤزو اوتاغیندا بو گنجلرین شعرلرینی
و باشقا یازیلارینی اوخویورام
آدینی چکمدیییم قالان وارمی؟
ائلیاد:ائلناز ایسلاموند
هادی قاراچای: اونوتموش دا اولا بیلرم
آی ساغ اول
آخی خانیملارین یاشینی بیلمک یاساقدیر
ماشاللاه هامیسی 18 یاشیندا قالیرلار
ائلیاد: اولسون قوی بئله اولسون.گنجلیییمیزین پوتانسیئلی چوخالیردا بئلهده
هادی قاراچای: پاخیل دئییلم اولسون
ائلیاد: هادی بای پالتالکدا کی اوتاغینیزا گؤره معلومات وئره بیلرسیز؟
هادی قاراچای:بازار گونلری(یئکشنبه)
آوروپا واختییلا ساعت 7 دن باشلاییر
دیلله یازین اوزرینه دانیشیلیر
چوخ ماراقلی دانیشیقلار گئدیر
ایچینده بئزدیریجی سؤز صحبت ده اولور
آنجاق بیر بیریمیزه دؤزوملو اولمالیییق
بونو دا اورادا دئنییریک،یوخلاییریق
پیس اولمور
ائلیاد: هادی بی من سورولاریمی ایکی بؤلومه بؤلموشم
بیرینجی بؤلوم بو گونکو یازینیمیزین دورمونا گؤریدی
ایکینجی ایسه سیزین اؤز یازینیز و شعرلرینیزه گؤره
ایستیرم سیزی بوندان آرتیق یورماییم دئیه
بیرینجی بؤلومو سونا چاتدیریم
آنجاق
بو بؤلومده ایرسه بیر سورو واردیر کی سیزجه گرک سوروشموش اولاردیم و سوروشمادیم بویورونوز
هادی قاراچای: دئمک اؤزوم اؤزومدن سوروشوب یانیت وئرمهلییه م، ائله می؟
ائلیاد: بلی
هادی قاراچای: اوندا باغیشلارسان
سوروشاجاغیم نسه یوخدور
منیم اؤز شعرلریمه گلینجه
بو دانیشیق اولمایاجاق
سن دانیشیغمیزی قورتارمیش گؤره بیلرسن
منیم شعرلریم اؤز دیرینی آلیب
شعریمیزین زیرپیسی منیم آدیما دوشوب
بو دا یئتر
ائلیاد: ائلهده بس بیر یا ایکی سورو قالیر کی بو بؤلومه آرتیرماق اولار یعنی چوخ شخصی دئییللر
اونلاری سوروشوم
؟
هادی قاراچای: قیسا اولسا اولار
ائلیاد: هادی قاراچایین شعری اؤزو اوچون (توپلوم اوچون یوخ)آراجدیر یوخسا آماج؟
هادی قاراچای: آراجدیر
منیم اؤزومدن اؤزومه بیر آراج کیمی گؤتورمک اولار
3جو بؤلوم
ائلیاد: هادی قاراچیین شعری آماجدیر یوخسا آراج؟
هادی قاراچای: دئدیم دا آراجدیر
اؤزومدن اؤزومه یئتیشمک
بو "اؤزومه" هادی قاراچای اولمایا دا بیلر. کیم ایدی دئییردی "من بیر باشقاسیدیر"
بو من و منیم کیمی اولانلاری چئوره ییر. اونا گؤره ده بو "اؤزومه" گئنیش بیر کوتله نی اؤز ایچینه آلا بیلر
آلمایا دا بیلر. سنی اؤزونونکو، اؤزونو سنینکی بیلمهینلر ده اولا بیلر
نه اولور اولسون
منه شعر آماج اولماییب
ائلیاد: هادی قاراچایین دیلی اولدوقجا مؤحکم دیلدیر.بو دیلی هادی قاراچای هاردان تاپیب؟
هادی قاراچای: مؤحکم دئدییینیزده نه یی دوشوندونوز یاخشی بیلنمه دیم
آنجاق بو دیلی من تاپمادیم
بو دیل ایتمه میشدی داها دوغروسو
ایتمهین دیلین تاپانی دا اولماز
آنجاق
دده قورقودون
اسگی اورخون یئنیسئی یازیتلارینین
دیوان لوغاتتورکون، بو دیلین اولوشوموندا چوخ بؤیوک پایی اولوب
ائلیاد: شعرلرینزده فورمایا نه قدر فیکیر وئریرسیز؟ایسته سز آچیق شعرده فورمانی تعریفلییهسیز نه دئیه رسیز؟
هادی قاراچای: منیم اوچون شعرین فورماسی پوئتیک بیر یووارلیقلیغی آندیریر
یومورو بیر شار
بیر توپ گوللهسی
نه بیلیم
اؤزو اؤزونه دؤنه بیلن، اؤزونه قاییدا بیلن بیر توپ کیمی وارلیق
ائلیاد: شعرلرینیزین یازیلماق پروسئسینده ایلهام آدلی بیر اولایا اینانیرسیز؟
ایرسه جوابیز موثبتدیر
سیزجه ایلهام نه دئمکدیر
؟
هادی قاراچای: یوخ، من ایلهام دئییلن بیر وارلیق تانیمیرام
ائلیاد: اؤز شعرلرینیزین ایچینده اؤز سلقهنیزله اوچونو سئچینیز لطفا
ً
هادی قاراچای: منیم بیر چوخ شئیرلریمین آدی یوخدور
ائلیاد: اولسون آدرئس وئرین
آنجاق آدرئس وئره بیله رم
کیتابلاریمین ایکیسینین ده باشلانغیجیندا "اؤن سؤز یئرینه" دئیه شعرلر گلیب. اونلارین ایکیسی ده منیم سئودیکلریم شعرلردیرلر
بیرده "آلما یولو" و شعر آکادئمیسینده وئردیییم "پای" شعرینی وئرردیم
ائلیاد: او شعرینیزی منده چوخ سئویرم
تکی سؤزجوک باشی
...
هادی قاراچای: لوطفونوز وارمیش دئمک
ائلیاد: دونیا شاعرلریندن کیملری سئویرسیز؟
هادی قاراچای: بورخئسی
نئرودانی
ائلیوتو
اؤز شاعرلریمیزدنسه سوروشماسان دا دئییم
ناظیم حیکمتی
قورتاردیقمی؟
ائلیاد: قورتارماقدان اؤنجه هر نه سؤزوز واردی کی دئمه یینی لازیم گؤرورسوز بویورون
هادی قاراچای: شعر یازین، قویون سیزی شاعر بیلمهینلرده سؤزلرینی دئسینلر، بیلنلر ده دئسینلر
شعر یازین، اؤزونوزو و ایلگیلندیکلرینیزی تانیماغا یاردیمچینیز اولاجاق
شعر، د ل ت (دیوان لوغات التورک) اون دیلینده دئسم "ائم" دیر، مرهم دئمکدیر.ایستئدی؟اینجه آجی دا اولا بیلر
آجیدا بیلر، سئودییین قیزین گولوشونجه شیرین و دادلی دا اولا بیلر، گولدوره بیلر
شعر یازین، سیزی ایرینلمیش یارا اوزرینه باسیلان اود کیمی آجیدسا دا پارتلامیش انجیر کیمی دویغونوزو ائسروکلدسه ده شعر یازین
شعر قورتولوشدور بوتون بیر آنلامیندا قورتولوش،چوخ یؤنلو بیر قورتولوش.آچیقلاماسینی شاعرلر بیلیر
ساغ اولون
منه آییردیغینیز بو گون اوچون بو آن اوچون چوخ ساغ اولون
ائلیاد: باشینیز قالابالیق اولا اولا بو نئچه گونو بو دانیشیغا واخت آییردیغینیزا گؤره میننتدارام
هادی قاراچای: دیمز
ائلیاد: دوغورداندا بو دانیشیق ائله منیم اؤزوم اوچون چوخ فایدالانمالییدی
هادی قاراچای: هانسی بیر شعرده بئله بیر میصراع وار: و آنسیزین
اؤلمدیییم یادیما دوشدو
بونو یادیما سالدیغینیز اوچون آندیردیغینیز اوچون ساغ اولون
ائلیاد: هادی قاراچای گونئییمیزین ان چوخ سئویلن شاعرلریندندیر
بو قدر راحت و صمیمی بیزله دانیشدیغینیزا گؤره میننت دارام
هادی قاراچای: و ان چوخ سئویلمه یه نی ده ائله اؤزودور
قورتاردیقمی دوست؟
ائلیاد: ضارافات اولاراق بو سؤزوده ائشیتدیک دا نئیلمک
هر نه اوچون ساغولون
هادی قاراچای: من جدی دئدیم
ائلیاد: منده جدی دئدیم
سیزه اوزون عؤمور آرزیلیرام
هادی قاراچای: شعرین هر دؤنمینده بو پارادوکسلار اولوب اولور اولاجاق
ساغ اول
ائلیاد: همشه کی کیمی اوغورلو گونلر آرزیلیرام سیزه
اؤپورم
ساغولون
هادی قاراچای: چوخ ساغ اول
سنه ده اوغورلار
هادی قاراچای
۱
پای
تکي
سؤزجوکباشي
بير نئچه سسين بيرلشمهسي اولسايدي
من
سيرالانميش ياراقليلار دئسيديم
سن،بير چلنگ اولدوز گؤرسيدين گولوشن
قارا کؤينهیينده گئجهنين
من
گولـله دئسيديم
سن گول اییلهسئيدين
من
گؤزلري باغلانميش گونش
قوللاري ساريلميش هاراي دئسيديم
سن سئويشمکده چيرپان اورک
دوغوم سانجيسيندا گلين گؤرسئيدين...
ايمگهسيز
بوتون سؤزجوکلرين اؤتهسينده
من،اجام دئيه باخايديم
و سن
ياخاسيني بوشالدايدين قيرميزي کؤينهیينين.
۲
بیلیرم
سئویرسینیز منی
منی سئویرسینیز
ایشله ک اللریمله
ایپک
تئللریمله
هله،
دوغمامیش مندن سئویملیسی
قانیمین آلینا آند ایچهرک
بو ائلین ، بو یوردون
ان قارانلیق دلمه دئشیکلریندن گلیر.
داملا-داما
سئوگی قوخویور
قورخان باخیشلارینیز
سیز ائی اوستوموزه گلن گونولر.
گؤزلریمین بوغدا قوخوسویلا
اللریمین
پیچاق کسمز قابارییلا
یولسوز یولونوزو کسن
یوخونوزدا گزن
بو قان بو قیلینج منم.
اؤلسم
اؤلوموم ایزله ییر سیزی
قالسام اورییمین دؤیئش طبیلی
مندن قاچاجاغینیز یوخ.
بیلیرم سئویرسینیز منی
منی سئویرسینیز.
ایشله ک اللریمله
ایپک تئللریمله
هله
دوغمامیش مندن سئویملیسی.
۳
سارایلارین قپیک-قوروش دیلنچیسی ایدی
باکیر قزلارین
قولاقلارینین قیزیل سیرغاسی
و دؤشلرینده
شاهلارین دوداقلاریندان قالمیش اؤپوش سئلیکی
و ایندی
دونیانین گؤزلرینده کیشنهین
آغ-آپباق قانادلی بیر آت.
بابکین سیییریلمیش قیلینجی
بئیرکین قانلی کؤینیی
دؤیوش سنگرینده یارالی عسگرین سون گوللهسی
و باغداددا
آمریکالی عسگرلرین یوخوسونا ایشی ین
عرب جوجوغونون سهر سیدیی.
آه ای موبارک دیل
و ای قوجامان شعر.
3/21/2009 - 4/20/2009
12/21/2008 - 1/19/2009
11/21/2008 - 12/20/2008
10/22/2008 - 11/20/2008
9/22/2008 - 10/21/2008
آرشيو
یاشماق
نادیر ازهری - نگین نواده رضی
همت شهبازی
آیدین آراز
بایقوش
باراز
ائلناز ایسلاموند
سیما دیدار
علیرضا آقازاده (نیسگیللر)
یواداش صحیفه لر
زامان
یازینیمز اوزره یازلار 6
يازينيميز اوزره يازيلار5
یازینیمیز اوزره یازیلار4
یازینیمیز اوزره یازیلار3
آیخان علیزاده
محمد صبحدل
چاغمورلو
رامین جهانگیر زاده
محمد صفری
آیدین آراز
فتح الله ذوقی
حامید احمدی
خ وعیدی
محمد قضایی
صالح سجادی
کیان خیاو
دومان اردم
قرنفیل
علیرضا سیف الدینی
علی عباسی
حميد آصفي
بهروز صدیق
رضا کاضمی
لیدا احمدی
محمود مهدوی
اوچ سايين شاعير
ارسطو مجرد
آرش ساعي
آيدين يارين
ساوالان قيزي
مصطفي شيخ پور
اكبر شفيعي
سيد حيدر بيات
جعفر بزرگ امين
آتيلا اسكنداني
غفور تقي اوغلو
سامان حسن زاده
مين بير اؤيكو فستيوالي
چاغداش
رسول یونان
هجر
اولکر اوجقار
سید جواد ابوترابی
بهمن خادم
اولدوز صادق
بوتون باغلانتیلار